تقارير الآنسة ياء - التقرير الثالث

تقارير الآنسة ياء

كتبت: ياسمين الطوخي

 التقرير التالت

السيد باء ... ياء

الموضوع بدأ من ١١ سنة يوم الجمعة وقت الشوارع هص فيه لعل وعسى نرجع تاني تعرف تروح يوم الجمعة عند جدتها بدون ما تشغل بالها بالحظر ... وانتهى الموضوع من ١٠ سنين!
وبدون سابق إنذار كانت من الناس اللي رجعوا يشوفوه تاني من أيام ما كانت المشاهدات ٣٣ مليون لحد ما وصلت لـ٣٣٣ مليون وده رقم خزعبلي في سنتين.
..
كانت فاكرة أنها لوحدها من ٣ سنين أو من سنتين، بس النهاردة أما شافته تاني في نفس المكان اللي شافته فيه أول مرة فرحت له جدا لأنه كان رد ربنا عليها أنه بيرد لكل واحد حد جه عليه حقه في الوقت المناسب..

...

بين الإعداد والاستخدام
كانت دائما بتسمع دعاء اللهم استخدمنا لا تستبدلنا.. قالوا لها وهي صغيرة يعني أنه ربنا دائما يجعلنا سبب نخدم الناس! إجابة رائعة
بس أما كبرت وفكرت فيها أكتر (الآنسة ياء لسة صغيرة بس الكاتبة تقصد أما طولت شوية) لقت أنه الاستخدام ده مش حاجة عادية كدا
ده مرحلة من الإعداد الرباني بمواقف وابتلاءات وحاجات كتير لو قدرت تخرج منها إنسان بجد فأنت جاهز للاستخدام وده مش شرط خالص تكون على وعي به في عز عز الإعداد .. الإنسان بيبص للي هو فيه لو وحش وبيسعى يخرج منه لكن مش بيبقى عارف ده بوصلته لفين لأنه مش ضامن حاجة!
زي ما حصل مع السيد باء ياء كدا
...
توقعت حد يسألها يعني ايه إنسان بجد؟ يعني عنده قدر كبير من الرحمة واللين بيهضم كل اللي شافه من سخافات ويطلعها في صورة لين .. اللي الرسول قال عنه الهين اللين السهل .. ده إنسان بجد!
...
ترجع تاني الآنسة ياء للسيد باء ياء، في حلقات شافتها له قبل ما يرجع للضوء المحلي تاني وهو بيحكي عن تعرض لايه وشاف ايه خلال السنين اللي فاتت ..
وهنا، وقفة مهمة على الماشي لأنه لولا وجود حد يشيل معاه القفة دي يمكن كان اتعثر.. جزء من الإعداد بدا أنه ربنا يرزقك شخص يكون عليك مش ضدك .. (وهنا الآنسة ياء مسكت نفسها بالعافية ومرضيتش تسترسل في الموضوع ده الحمد لله الكاتبة قدرت تحجم القصة)
المهم أنه السيد باء جه استخدامه من ربنا في عز الحرب بطريقة غريبة تخلي أي إنسان طبيعي يقف يفكر ولو بعد حين في قدرة ربنا (الإنسان الطبيعي ده الدرجة اللي سابقة الإنسان اللي بجد) اللي من برا فرحت بيها ياء كأي حد بس مش شرط خالص أنها نفس المشاعر عند السيد باء!
...
المهم وعشان الآنسة ياء رغاية، هي فرحت جدا أما شافته أول الشهر، حسيته أنه رسالة ليها هي كمان أنه استبشري خير في اللي جاي وكل واحد وله يوم فتحه! هو الاستخدام بييجي عادي كدا؟!!!!!!

أكتوبر 2025

القاهرة