استمارة 6 #خالد_حبيب #تجارب_وقصص

كتابة: ياسمين الطوخي

لما تحس أنك ممكن تاخد استمارة 6 وأنت لسة بتقول يا هادى!

آراء كتير اختلفت حوالين الكتاب. ناس شيفاه عظيم وهايل، وناس شيفاه سطحى ودون مستوى التوقعات. وده يمكن مرتبط بالوقت والمرحلة عند كل متلقى. ناس لسة بتقول يا هادى فبالنسبة لها كل كلمة فى الكتاب هى نور هتمشى عليه وتتجنب بيه حاجات كتير (إن أمكن). وناس تانية يمكن عدت بالمكتوب فأصبح بالنسبة لها مألوف وبالتالى لسان حالها (ايه الجديد، اللى بعده)!

أما جيت اقرأ استمارة 6 مكنش فى دماغى توقعات كتير. عايزة اقرأ كتاب بيحكى فيه واحد عن نفسه بصدق. لا هى سيرة ذاتية ولا هى مواعظ. حكايات حياتية مش مكتوبة بالتفصيل الممل وبالتالى معرفش بالظبط ما وراءها. كل حكاية من ال50 ممكن تكون كتاب لوحدها لو سرد الكاتب اللى حصل بالظبط. ولو قلنا أنهم 50 حكاية وكل واحدة خدت لها سنة، يعى 50 سنة خبرة نقدرها وننتظر منها المزيد. ولو تقاطعت حكاية مع حكاية، يعنى ضغط أكبر وخساير أكتر ويمكن مكاسب أكتر.

يمكن اللى شايف الكتاب مجبش كتير ليه حق، فيه حاجات تحسها مكررة وغريب أوى أن مَثَل زى خالد حبيب يمر بيها! 

بس لك أن تتخيل أنه بنى آدم. فطبيعى جدًا يشوف نفسه جامد فى مجاله.

هو نفسه فى الكتاب بيقول كدا:"مش لازم اتكلم تانى عن حبى العنيف لفكرة إضافة القيمة، واستمتاعى الأشد عنفًا لما حد ينبهر بيّا، نقطة ضعف البشر الأكبر هى الغرور بلا جدال."

وده أكيد له علاقة مباشرة بكونه مدير فى أغلب الأحيان. وراجل كبير أحيان كتير. ورغم انتقاده للراجل الكبير شبه الدائم إلا أنه وده على لسانه:" اكتشفت إنه أنا كمان كنت الراجل الكبير فى أوقات كتير، وممكن أكون عملت بلاوى وحبيت وكرهت وظلمت ودلعت ناس وانا بالعب دور الراجل الكبير..وياما ضحكوا عليا وانا مستمتع بدور الراجل الكبير."

ويمكن ده حال أغلبنا. بنشوف نفسنا زى الفل، وأما حد يغلط أو يضعف على طول نطلع له استمارة 6 .. بس فى المقابل، فيه ناس بتعرف تعذر وتشوف الصورة بهدوء حتى فى ظل الحياة السريعة وضغط الشغل .. "الناس بتتغير حسب اللى حواليها. والناس عمرها ما تنسى إنك شفتها فى لحظة ضعف أو ألم. بس منها اللى يفتكرك بالخير، ومنها اللى يبقى مش طايقك وعايز يخلص من الصورة والذكرى. عمرنا ما هننجح طول ما إحنا بنطارد حد عشان نبقى أحسن منه."

ولأنك ممكن تحس باليأس فى أول الطريق. أنك لسة بتقول يا هادى وبدل ما الكبير يديك كارت أصفر، وفرصة تانية يعلمك أما تغلط. يطلع لك الكارت الأحمر ويقولك خد استمارة 6 واتفضل. اقرأ الكتاب ده. هتعرف أن كلنا فى كفاح مشترك، وأن الحياة مش دايما وردى. وأن تقدر لو اخترت أنك تكبر نفسك. وأن الحياة فرص وتجارب وصعوبات وقصص وعبر بنتعلم بشكل يومى منها. ولأنها صنيعة ربنا، فهى تستحق تتعاش. "الدنيا مش دايمًا حنينة على البنات الصغيرين، والظروف الصعبة والصدمات فى اللى حوالينا بتخلينا كتير نقفل على روحنا ونرفض كل كلمة ممكن تخلينا نفرح، بنخاف الفرح مايدومش، وبنحرم نفسنا منه."

.........................

استمارة 6 هو كتاب للدكتور خالد حبيب، صادر عن دار نهضة مصر، الطبعة 2 يناير 2018، عبارة عن تجارب وخبرات شخصية مكتوبة بلغة عامية بسيطة جدًا.